في البداية وقبل ما نبدأ المقال بتاعنا واللي هنتكلم فيه عن النيوس جاكينج أو اصطياد الأخبار خليني أرحب بيك وأقول لك أهلا بيك في سكوب حيث المحتوى العربي – القيم – المجاني .. ونبدأ المقال بتعنا بالإجابة علي سؤال مهم جدا وهو ماذا يعني مصطلح النيوس جاكينج أو مصطلح اصطياد الأخبار
ما هو النيوس جاكينج؟
يُعرف مصطلح النيوس جاكينج بمصطلح “اصطياد الأخبار” ويقصد به “استغلال الأخبار أو المواقف أو الترند الموجود علي الساحة في الوقت الحالي و شاغل الرأي العام في عمل محتوى تسويقي و ربطه بالمنتج أو الخدمة اللي بتسوق لها.
أو بمعنى أخر هو إنك بتشوف أكتر خبر أو حدث موجود على الساحة في الوقت الحالي والناس كلها بتتكلم عنه وتبدأ بعمل محتوى تسويقي يربط بين الخبر ده وبين المنتج أو الخدمة اللي أنت بتقدمها للناس.
وطبعا الخبر عشان يكون شائع أو يصل الي مرحلة الترند لازم يمر بعدد من المراحل وعشان تقدر تستخدم الترند ده وتربطه بالمنتج أو الخدمة اللي بتقدمه لازم تعرف ايه هي المراحل دي وكمان لازم تعرف في أي مرحلة تبدأ تجهز المحتوي بتاعك عشان تنزله علي قنوات الاتصال بتاعتك وده اللي بنسميه مراحل حياة الخبر .
وفي المخطط الذي يوضح مراحل حياة الخبر ويوضح تقنية اصطياد الخبر أو النيوس جاكينج في مرحلة مبكرة، كما أن هذا المخطط يوضح المراحل الأساسية فقط، أما عن الزمن فقد يكون يوم أو أسبوع أو حتى أشهر، كما أن الأهتمام قد يكون محلياً على مستوى المدينة، دولة، قارة، أو حتى على مستوى العالم، وقد تعيش كل مرحلة من هذه المراحل معارك شرسة بين أشخاص أو شركات أو جهات اعلامية كبيرة للوصول بالخبر لمرحلة الإهتمام والإثارة الشعبية وقد يكون في الطرف المقابل جهات تسعى جاهدة لقتل الخبر ودعم أي نشاط يسعى لأخذ الخبر لمرحلة النهاية والموت.
أقرأ ايضاً: مقال عن الغوريلا ماركيتنج أو التسويق بإستخدام حرب العصابات.
مراحل النيوس جاكينج أو اصطياد الأخبار:
وحيث ان الخبر يمر ب 5 مراحل اساسية تبدأ بمرحلة ظهور الخبر حتى المرحلة التي يموت فيها الخبر أو يصبح خبر قديم بحيث لم يعد يتذكره احد أو كما يقولون قد عفا عليه الزمن، وهذه المراحل هي:
1- مرحلة الأخبار العاجلة أو الـ Breaking news: والمرحلة دي اللي بتكون مرحلة حدوث الموقف أو الخبر اللي بيتم استغلاله و الفترة الزمنية اللي بيبداً ينتشر فيها .
2- مرحلة الإثارة أو الـ Excitement Grows: المرحلة دي بيبدأ يتحول فيها الخبر أو الحدث لتريند و بيبدأ كل الناس تتكلم عنه ودي المرحلة اللي بتبدأ فيها تجهز للمحتوى بتاعك بحيث أول ما الخبر يخش الترند تكون انت جاهز بالمحتوى بتاعك وتبدأ في عملية النشر للمحتوى بتاعك.
3- مرحلة القمة أو الـ Peak: و دي بتكون المرحلة اللي بيوصل فيها الخبر أو الحدث لأعلى عدد متابعة و مشاهدة من الجمهور و أعلى انتشار له و تم استخدامه في عدد كبير من المحتويات التسويقية .
4- مرحلة الخبر القديم أو الـ Old news: دي المرحلة اللي بيتحول فيها الخبر او الحدث لخبر قديم كل الناس اتكلمت عليه و بدأ التفاعل عليه يقل جداً و يختفي .
5- مرحلة النهاية أو الـ Done: المرحلة دي اللي بيكون فيها الخبر أو الحدث عدى عليه وقت و مافيش كلام تاني عليه ولا تفاعل .
أمثلة للنيوس جاكينج أو اصطياد الاخبار:
ودي مجموعة من الأمثلة علي النيوس جاكينج وإزاي الشركات قدرت تستغل الأخبار العاجلة وتربطها بالمنتج أو الخدمة اللي بتقدمها ..
شركة أوريو: كانت نجمة اعلانات سوبر بول 2013، حيث استغلت الشركة لحظة كارثة انقطاع الكهرباء أثناء المباراة! ونشرت التغريدة الشهيرة Power out? No problem you can still dunk in the dark
ترند لون الفستان:
وكلنا يذكر التغريدة الشهيرة للشابة الاسكتلندية “كيتلين ماكنيل” (21 عاماً) عندما نشرت صورة لفستان وتسأل عن لونه الحقيقي، عندها تصدر حديث الصحافة العالمية ووكالات الإعلام الغربية والعربية كما ساهمت مئات الشخصيات والشركات الشهيرة مثل Adobe غيرها في إبداء الرأي والتحليل لهذه الصورة، وهنا سارعت العديد من الشركات بتوفير المنتج بشكل سريع وعرضه على الإنترنت.
شوكولاتة سنيكرز:
في كأس العالم 2014 قام اللاعب الأوروجواياني لويس سواريز بـ “عض” مدافع إيطاليا جورجيو كيليني، وزي أي حدث رياضي مثير للجدل سواريز بقى تريند على كل مواقع التواصل الاجتماعي، واستغلت كتير من البرندات الحدث ده لكن من أظرف البرندات إللي استخدمت النيوس جاكنج في الحدث ده ” سنيكرز “.
سنيكرز وجهت رسالة ل سواريز وقالتله ” المرة القادمة لو جعان خدلك حتة من ال سنيكرز” التويته دي التفاعل معاها كان عالي جداً، ووصل عدد مرات إعادة التغريد لأكثر من 44 ألف شخص بالإضافة لزيادة عدد المتابعين للحساب بشكل كبير.
النيوس جاكينج سلاح ذو حدين:
ودي كانت مجموعة من الأمثلة لاستخدام بعض الشركات فكرة النيوس جاكينج ومن الجدير بالذكر أن النيوس جاكينج هو سلاح ذو حدين فـ الإستخدام الخاطئ له قد يسبب لك خسائر كبيرة جداً تصل إلى اغلاق الشركة أو حتى الافلاس. وهذه أمثلة علي بعض الأستخدام الخاطئ للـ النيوس جاكينج.
الحادثة الشهيرة في السعودية والتي استحوذت على تريند تويتر تحت هاشتاج “جلد العم معيض”
وفي نهائيات كأس العالم 2014 بعد خروج المكسيك، نشرت الخطوط الجوية الهولندية تويته عبارة عن “وداعاً يا أصدقاء” مشيراً إلى خروج المكسيك من كأس العالم، حصل جدل كبير جداً بسبب التويت دي، وبعض الناس دعوا لمقاطعتها ومن ضمنهم شخصيات رسمية.
و علشان تقدر تعمل النيوس جاكينج بشكل قوي يبقى انت لازم تاخد بالك من الحاجات دي :
1- لازم تعمل النيوس جاكينج في المرحلة الأولى و الثانية .
2- لازم تربط المحتوى اللي هتقدمه باستخدام النيوس جاكينج بالمنتج أو الخدمة اللي بتقدمها.
3- لازم الفكرة اللي بتقدمها وهتربطها مع الحدث أو الخبر أو التريند تكون قوية جداً.
4- و انت بتعمل النيوس جاكينج ابعد عن استخدام الأخبار السلبية اللي لها علاقة بالحوادث و الموت و الأمراض
5- فكر كويس جداً في النتائج اللي هتحصل بعد ما تعمل النيوس جاكينج وتقدمه للجمهور علشان الموضوع ما يقلبش عليك و يعاملوك انت ترند من السخرية و انتقاد فكرتك.
ملحوظة لو انت هتستخدم النيوس جاكينج لازم تأخذ في الاعتبار الحاجات اللي احنا ذكرنها فوق ولازم تعرف ان النيوس جاكينج زي ما هو بيحقق نتائج كويسة الا انه قد يضر بالمنتج بتاعك لو تم استخدامه بشكل خاطئ.
وفي نهاية المقال بتعنا واللي اتكلمنا فيه عن النيوس جاكينج أو ما يعرف بمصطلح اصطياد الأخبار، واللي المفروض تكون عرفت ما هو مصطلح اصطياد الاخبار وازاي تستخدمه، واشهر الامثله لبعض الشركات اللي استخدمت النيوس جاكينج وحقق معاها نتائج ممتازة.
وأتمني إن المقال يكون نال اعجابك كقارئ وتكون استفدت من المقال وان وفقت فهذا فضل الله وإن كان هناك خطأ فمني والشيطان .. استودعكم الله الي ان نلتقي في مقال جديد وحتى هذا الوقت لو عندك اي استفسار سيبه في تعليق.. في أمان الله.
